Þröng föt éta upp sálina

Söngkonunni Beth Ditto líður vægast sagt mjög illa í þröngum fötum. Hún segir óþægilegan fatnað éta upp sálina hennar.

Beth, sem skaust upp á stjörnuhimininn með hljómsveitinni The Gossip, hefur slegið í gegn þegar kemur að klæðaburði. Hún er andlit bresku fatakeðjunnar Evans sem framleiðir fatnað á konur með mjúkar línur.

„Ég er að skoða föt fyrir nýju línuna. Það bíða mín nokkrar flíkur sem ég ætla ekki einu sinni að prófa. Ég finn að þær hreinlega éta upp sálina mína bara við það að horfa á þessar þröngu litlu flíkur. Það er eitthvað ekki rétt við sniðið á þeim," sagði Beth.

Söngkonan er meðvituð um að það er ekkert mál fyrir konur sem nota ekki stærð núll að klæða sig á kynþokkafullan hátt.

„Það eru óteljandi hlutir sem ekki hafa verið reyndir á fatnað fyrir okkur sem erum í mýkri kantinum eins og að setja mittisbeltið á annan stað en vanalega er gert," sagði Beth.