Óróinn bendir ekki til gosloka

Virkni eldgossins á Eyjafjallajökli síðastliðinn sólarhring hefur verið mjög svipuð samkvæmt mælingum og hún var í gær. Vatnsrennsli í Markarfljóti hefur haldist nokkuð stöðugt um 6,1 metri við gömlu Markarfljótsbrúna. Óróinn hefur einnig verið nokkuð svipaður síðastliðinn sólarhring og bendir hann ekki til þess að gosinu sé að ljúka.

Þá virðist gjóskufall mjög svipað og í gær, en vindáttin hefur snúist og sveigði strókurinn til norðurs í dag. Gjóskuský kom fram á gervitunglamynd í morgun, en það hefur minnkað mjög mikið miðað við síðustu gervitunglamynd. Aska er lítil í loftinu, en þó nægileg til að valda truflun á flugi.