Vill vinna aftur með Degi Kára

Bandaríski leikarinn Paul Dano, sem leikur annað aðalhlutverkanna í nýjustu mynd Dags Kára Péturssonar, The Good Heart, segist vel geta hugsað sér að leika aftur fyrir hann.

„Mér finnst hann mjög hæfileikaríkur og ég er hrifinn af myndunum hans. Ég vona að hann geti gert margar í viðbót,“ segir Dano í viðtali við Fréttablaðið.

„Það er gaman að fleiri raddir séu farnar að heyrast frá Íslandi sem eru að reyna fyrir sér utan landsteinanna og ég vona að hann geri aðra mynd sem allra fyrst.“

Hinn 25 ára Dano er upprennandi kvikmyndastjarna sem fyrst vakti heimsathygli í Little Miss Sunshine. Síðan þá hefur hann leikið í myndum á borð við There Will Be Blood, Taking Woodstock og talað inn á Where the Wild Things Are.

Tökur á The Good Heart fóru fram bæði í New York og á Íslandi og dvaldi Dano í um tvo mánuði í Reykjavík. „Ég sakna Íslands. Ég átti góðan tíma þar. Þetta var fallegur staður og allir voru vingjarnlegir. Ég hlakka mikið til að fara þangað aftur,“ segir hann.

„Ég eignaðist góða vini þar og ég hef bara góða hluti að segja um land og þjóð.“

Ítarlegt viðtal við Dano verður í Fréttablaðinu á morgun þar sem hann ræðir nánar um The Good Heart, kynni sín af Íslandi og kvikmyndaferil sinn. Þar er af nógu að taka enda hefur hann unnið með mörgum af þekktustu stjörnum heims, þar á meðal Tom Cruise og eiginkonu hans Katie Holmes. - fb