Spiderman-söngleik frestað

Frumsýningu söngleiksins Spiderman: Turn Off the Dark hefur verið frestað enn á ný – nú þangað til í febrúar. New York Times greinir frá þessu, en frumsýna átti söngleikinn 11. janúar.

Söngleikurinn er þegar orðinn dýrasta Broadway-sýning allra tíma og er kostnaðurinn kominn yfir 60 milljónir dollara. Leikstjórinn Julie Taymor stendur á bak við sýninguna og félagarnir Bono og Edge úr hljómsveitinni U2 sjá um tónlistina.

Samkvæmt frétt New York Times á kostnaður við sýninguna bara eftir að aukast þangað til í febrúar. Endurskrifa þarf samtöl og atriði ásamt því að Bono og Edge þurfa að semja nýja tónlist.