Tengdasonurinn fullnægjandi

Joe Simpson, hinn óstýrláti faðir Jessicu Simpson, er himinlifandi með nýja tengdasoninn, Eric Johnson. Johnson, sem lék ruðning með San Fransisco 49ers og New Orleans Saints en hefur lagt skóna á hilluna, hefur að sögn Joe gert Jessicu einstaklega hamingjusama.

„Líf hennar hefur aldrei verið betra,“ segir Joe í samtali við Us Weekly. Jessica kom mörgum á óvart þegar hún byrjaði með Eric enda ætti hún að hafa brennt sig á NFL-leikmanni eftir áralangt ástarsamband þeirra Tonys Romano, leikstjórnanda Dallas Cowboys. Það endaði með því að stuðningsmenn liðsins snerust gegn henni og kenndu söngkonunni um slakt gengi liðsins.

En nú hefur Jessica sem sagt fundið ástina á ný í örmum Erics og pabbinn gæti ekki verið glaðari. „Hún hefur hreinlega aldrei verið hamingjusamari. Og ég reikna fastlega með því að ástin eigi eftir að rata inn í nýju lögin hennar Jessicu.“