Fullur með Gaga

Samkvæmt tímaritinu The Insider neyddist Anderson Cooper, fréttahaukurinn hjá CNN, næstum til að hætta í miðju viðtali við söngkonuna Lady Gaga sökum þess að hann var að verða of fullur. Lady Gaga bauð Cooper upp á viskí á meðan þau ræddu saman á bar í London en Cooper er hins vegar ekki mikill viskímaður. „Hún náði í drykki handa mér, tvo að mig minnir, og eftir smá stund var ég reiðubúinn að slíta viðtalinu því ég gat ekki spurt fleiri spurninga,“ viðurkennir Cooper. CNN-maðurinn segist hins vegar vera ákaflega þakklátur fyrir að hafa fengið að eyða tveimur helgum með poppstjörnunni. „Það var virkilega skemmtilegt,“ játar Cooper, sem hingað til hefur verið þekktastur fyrir að leiða áhorfendur bandarísku fréttastöðvarinnar í allan sannleikann um hörmungar á hamfarasvæðum.