Segist ekki hafa verið undir áhrifum heróíns

Peaches Geldoff, dóttir góðgerðapopparans, Bob Geldoffs, neitar því að hún hafi verið undir áhrifum heróíns á myndum sem óheiðarleg hjásvæfa lak á netið á dögunum.

Myndirnar hafa vakið heimsathygli enda sést Peaches þar með hálf lokuð augu, andlitsmálningin klesst upp á enni og við hlið hennar liggur óþekktur herramaður sem lak myndunum.

Sjálfur sagði hann, þegar hann lak myndunum, að þau hefðu verið undir áhrifum heróíns og svo sofið saman. Hann segist hafa verið í svo mikilli vímu að hann hafi skyndilega vaknað með henni í gufubaði í höfuðstöðvum Vísindakirkjunnar í Los Angeles. Sem sagt, frekar klikkað partí.

Lögfræðingur Peaches neitar þessu fyrir hennar hönd í dag. Þá sagði hann einnig að það kæmist enginn inn í Vísindakirkjunnar sem væri ekki meðlimur í henni. Því væri útilokað að þau hefðu verið þar.

Þess má geta að móðir Peaches lést sjálf úr ofneyslu heróíns.