Ólafur meðal þeirra bestu

Íslenski listamaðurinn Ólafur Elíasson er meðal níu listamanna sem koma fram í níu þátta heimildarmyndaþáttaröð bandaríska sjónvarpsrisans HBO undir nafninu Masterclass. Í þeim fá fimmtíu listnemar frá öllum hornum Bandaríkjanna að heimsækja fremstu listamenn heims, kynnast því hvernig þeir vinna og hvaða hugmyndir þeir hafa um listina. Leikstjórar þáttanna eru Karen Goodman og Kirk Simon en þau tvö hafa verið tilnefnd til þriggja Óskarsverðlauna fyrir stuttu heimildarmyndirnar sínar.

Fyrsti þátturinn verður frumsýndur 18. apríl næstkomandi en þá verður óperustjarnan Placido Domingo heimsótt. Meðal annarra listamanna sem taka þátt í þessu verkefni eru hin norska Liv Ullmann, arkitektinn heimsfrægi Frank Gehry og bandaríski kvikmyndagerðarmaðurinn Julian Schnabel sem gerði meðal annars The Diving Bell and the Butterfly.

Samkvæmt opinberri heimasíðu Ólafs er undirbúningur nú í fullum gangi fyrir opnun sýningar hans í Ullens-listamiðstöðinni í Peking sem verður 3. apríl og heitir „Tilfinningar eru staðreyndir“. Þá stendur til að listamaðurinn íslenski opni regnbogasýningu sína í Jerúsalem í maí. - fgg