Beyoncé á von á sínu fyrsta barni

Söngkonan Beyoncé Knowles og rapparinn Jay-Z eiga von á fyrsta barni sínu segja fréttir vestanhafs. Mikil eftirvænting er meðal aðdáenda þessa vinsæla tónlistarfólks.

Fjölmiðlar um allan heim gripu fréttirnar af Beyoncé Knowles á lofti í gær. Hún og eiginmaðurinn, rapparinn og tónlistarmógúllinn Jay-Z, eru meðal þekktustu tónlistarmanna heims og njóta mikilla vinsælda. Aðdáendur hjónanna biðu í allan gærdag eftir opinberri staðfestingu á þessum fregnum um að þau ættu von á barni en hún kom ekki.

„Samkvæmt okkar heimildum hefur Beyoncé það fínt og er nú að hvíla sig. Það er þó búist við því að hún muni halda áfram að vinna á meðan á meðgöngunni stendur. Okkur er líka sagt að Jay-Z sé mjög hamingjusamur með að eiga von á sínu fyrsta barni með Beyoncé,“ segir á slúðurvefnum Mediatakeout.

Talsmaður hjónanna hefur neitað að tjá sig um málið. „Við tjáum okkur ekki um persónuleg málefni,“ voru einu svörin sem fengust.

Jay-Z og Beyoncé gengu í hjónaband fyrir tveimur árum. Í nóvember á síðasta ári kvisuðust út sögur þess efnis að þau væru að reyna að eignast barn. Á sama tíma hefur Beyoncé reyndar látið hafa eftir sér að hún vilji einbeita sér að því að vera góð eiginkona áður en þau fara út í barneignir. „Rétti tíminn er ekki kominn en hann mun koma. Ég ætla að verða frábær móðir, móðir eins og sú sem ég á.“ Nú virðist sem rétti tíminn sé kominn.