Friðrik Ómar í útrás til Svíþjóðar

Einn ástsælasti söngvari þjóðarinnar, Friðrik Ómar Hjörleifsson, flytur til Stokkhólms eftir tvær til þrjár vikur og er ekki væntanlegur aftur í bráð.

Friðrik segir að það hafi verið kominn tími á nýja áskorun.

„Ég ætla bara að fara að semja tónlist með innfæddum og taka upp nýtt efni. Þetta eru sambönd sem ég hef komist í í gegnum Eurovision og undanfarin tvö ár hafa margir hvatt mig til að fara út. Nú var bara rétti tímapunkturinn,“ segir Friðrik en síðustu tónleikar hans á Íslandi verða annað kvöld þegar hann syngur Elvis-lög í Salnum, Kópavogi. Gestur á þeim tónleikum verður sjálfur Björgvin Halldórsson.

Friðrik kveðst ekki vilja upplýsa alveg strax hvaða menn þetta eru sem hann ætlar að semja með. Sumir séu þekktir fyrir þátttöku sína í sænsku Eurovision-keppninni. Þá hafa útgáfufyrirtæki í Svíþjóð óskað eftir fundum með honum. Söngvarinn er þó með báðar fæturna á jörðinni.„Ég ætla bara að gefa þessu sinn tíma og leyfa hlutunum að gerast á sínum hraða,“ segir Friðrik.

Söngvarinn viðurkennir að hann hafi verið kominn inn í ákveðinn þægindaramma á Íslandi og það sé vissulega svolítil áhætta að segja skilið við hann. „En ég held að partur af þessu sé einmitt að brjótast út úr þessu og reyna eitthvað nýtt,“ segir Friðrik en unnusti hans, Ármann Skæringsson, ætlar einnig að flytja með honum út og er verið að leita að vinnu fyrir hann. Þá upplýsir Friðrik að þeir hafi augastað á íbúð í Stokkhólmi og hann vonast til að landa henni fyrr en seinna.

„Ég held að ég hafi bara gott af þessu, ég veit alveg að ég á eftir að koma heim en draumurinn er að sjálfsögðu að syngja eigið efnið fyrir fullu húsi.“- fgg