Boyle fékk veglega afmælisgjöf frá Cowell

Susan Boyle, sem sló í gegn í þættinum Britains Got Talent, átti afmæli á fimmtudaginn var, fyrsta apríl. Simon Cowell, Idoldómari með meiru, gaf henni sennilega flottustu afmælisgjöfina en hann gaf út plötu Boyle, I dreamed a dream. Lagið hefur selt 8,5 milljónir eintaka um allan heim og það hittist þannig á að á afmælisdaginn fékk Boyle fyrstu greiðsluna frá fyrirtæki Cowells, sem heitir því viðeigandi nafni Syco.

Greiðslan var upp á litlar fjórar milljónir punda og því allar líkur á því að Susan fari nú að drífa sig í því að stækka við sig, en hún býr enn í bæjaríbúðinni sem hún ólst upp í.

Á afmælisdaginn var Susan hinsvegar stödd í Japan og hélt upp á afmælið á efstu hæð hæstu byggingar Tókýó, ekki amaleg staðsetning það.