Pils ávísun á frægð

Bandaríski hasarmyndaleikarinn Sam Worthington er handviss um að pilsið sem hann klæðist í stórmyndinni Clash of the Titans muni skjóta honum endanlega upp á stjörnuhimininn. Worthington þarf að vera í þröngu pilsi sem Perseus, sonur guðanna, en hann telur sig ekki þurfa að skammast sín neitt. Pils hafi áður gert góða hluti fyrir aðra leikara. „Sjáið bara ferilinn hjá Russell Crowe, hann var í pilsi allan tímann í Gladiator. Og hið sama gilti einnig um Eric Bana í Troy og Mel Gibson í Braveheart. Ég held meira að segja að þetta hafi verið fremur rökrétt ákvörðun hjá mér,“ segir Worthington í samtali við Parade.com.

Leikarinn segist reyndar hafa verið búinn undir umtalið í kringum pilsið en ekkert hafi getað varað hann við fjölmiðlafárinu vegna rauðu strigaskónna sem hann klæddist á Óskarsverðlaunahátíðinni. „Ég valdi mér bara skó sem mér fannst vera þægilegir, keypti þá í Play­less. Mér var alveg sama hvað fólki fannst, en það kom mér á óvart hversu mikla athygli þetta vakti.“