Lady GaGa býst við að verða gaga

Söngstirnið Lady GaGa hefur viðurkennt að það gætu orðið örlög sín að frægðin geri hana geðveika. Hin 24 ára gamla söngkona varð heimsfræg í fyrra og hún segist hafa litla stjórn á því hvert frægðin fer með hana. „Ég er nú þegar biluð," segir hún í samtali við OK!. „Ég er ekki hrædd við neitt. Ef það verða örlög mín að missa vitið vegna frægðarinnar þá er það bara þannig."

Hún segist samt fullviss um að hún muni aldrei missa ástina á vinnu sinni og list. „Frægðin drepur áhugann hjá sumum og verður listinni yfirsterkari. En fyrir mig er frægðin eins og flugvélabensín. Því fleiri aðdáendur, því meira vil ég gefa af mér. Og ástríðan er svo sterk hjá mér að stundum get ég ekki sofið í marga daga."