Fegurðardrottningar ósáttar við undirfatasýningu

Aðalbjörg Ósk Gunnarsdóttir, sem var ungfrú Reykjavík 2008, gagnrýnir undirfatamyndband sem þátttakendur í Ungfrú Reykjavík 2010 voru látnir taka þátt í fyrir undirfataframleiðandann La Senza. Hún segir undirfatasýninguna sjálfa hafa verið á gráu svæði.

„Ég var í pínulitlu sjokki og þetta kom mér algjörlega í opna skjöldu," segir Aðalbjörg Ósk en Manúela Ósk Steinsson, fyrrverand Ungfrú Ísland, ræddi þetta fyrst á bloggi sínu á laugardaginn. Manúela var harðorð í garð skipuleggjanda keppninnar: „Ef ég hefði átt að koma fram í svona múnderingu á sínum tíma, þá hefði ég sleppt því að keppa! … tilhugsunin um að spranga um sviðið eins og erótískur dansari með afa minn og ömmu í salnum - ehhh, ég held ekki! Hvar er klassinn??"

Aðalbjörg segist ekki hafa vitað hvort umrætt myndband, sem hægt er að sjá á Youtube, væri grín þegar það rann yfir skjáinn.

„Myndavélarnar beindu sjónum sínum að brjóstunum og rössunum á stelpunum, þetta var mjög óviðeigandi. Ef mér hefði verið sagt að ég ætti að vera í g-streng og láta gera eitthvert myndband af mér í rólu þá hefði ég sagt nei takk," segir Aðalbjörg og bætir því við að henni finnist þetta í raun lítilsvirða hefðina á bakvið keppnir á borð við þessa sem gangi út á hina „elegant" konu. „Ég veit eiginlega ekki hvert þessi keppni er að stefna, verður þetta bara orðin einhver drasl-titill eftir tíu ár?" spyr Aðalbjörg.

Magdalena Dubik krýndi arftaka sinn á Hótel Íslandi á föstudagskvöldið. Hún var sammála því að undirfatasýningin hefði verið með djarfara móti og var ekki alveg viss um hvort hún sjálf hefði látið sjá sig í þeim efnislitla klæðnaði sem sumar stúlkurnar klæddust.

„Ég skil sjónarmið þeirra Aðalbjargar og Manúelu, undirfatasýningin var vissulega öðruvísi en hún hefur hingað til verið. Stundum hefur þessi sýning verið gagnrýnd fyrir að vera of lítið sexí, þetta er hárfín lína og vissulega voru þetta engin Hagkaups-undirföt. Mér fannst þetta flott sýning en síðan er það bara spurning hvort þetta eigi heima í þessari keppni."

Arnari Laufdal, sem hefur veg og vanda af keppninni, fannst sýningin ekki of gróf. „Mörgum finnst það of gróft þegar keppendur koma fram á bikiníi, mér finnst bara fínt að fólk skuli hafa skoðanir á þessu," segir Arnar.

freyrgigja@frettabladid.is