Sjónvarpsrisinn Fox ákvað að gera ekki prufuþátt eftir íslensku sjónvarpsþáttaröðinni Næturvaktin. Handrit eftir Adam Barr, handritshöfund Will & Grace, var tilbúið á teikniborðinu en Ameríkanar verða að bíða enn um sinn með að sjá sína eigin útgáfu af þeim Georg, Ólafi Ragnari og Daníel.
„Við erum svolítið spældir að Fox skyldi ekki fara í prufuþáttinn en þetta „pilot-season“ er mikið nálarauga og við komumst ekki í gegn að þessu sinni,“ segir Kjartan Þór Þórðarson, framkvæmdastjóri Saga Film, sem framleiðir þættina.
Þetta pilot-season sem Kjartan vísar til er tímabil hjá stóru amerísku sjónvarpsstöðvunum. Þá berast hverri stöð yfir þrjú þúsund hugmyndir að nýjum sjónvarpsþáttum en í kringum hundrað þeirra fara í handritavinnslu.
Þegar handritið er tilbúið tekur við enn ein sían því aðeins fimm til sjö af þessum handritum verða að svokölluðum „prufu-þáttum“ eða pilot. Og loks eru það aðeins tveir til þrír slíkir pilotar sem fá samning um sjónvarpsþáttaröð hjá stöðinni.
Kjartan og félagar hjá Saga Film eru þó með plan B því nú ætla þeir að kynna Næturvaktina fyrir kapalsjónvarpsstöðvarnar í Ameríku.
„Þessi þættir henta í raun miklu betur fyrir kapalinn og þetta er miklu einfaldara ferli, hjá kapalsjónvarpsstöðvunum er ekkert sérstakt tímabil eins og hjá stóru stöðvunum en að sama skapi þýðir þetta líka minni peningar.“ -fgg
