Dánarbú gerir risasamning

Dánarbú Michaels Jackson hefur undirritað stærsta plötusamning allra tíma við Sony sem tryggir því að minnsta kosti 200 milljónir dollara, eða um 25 milljarða króna.

Upphæðin gæti hækkað í rúma þrjátíu milljarða króna ef ákveðin skilyrði verða uppfyllt. Samningurinn kemur sér einkar vel fyrir dánarbúið því Jackson skildi eftir sig miklar skuldir þegar hann lést 25. júní í fyrra.

Samkvæmt samningnum verða gefnar út tíu plötur með popparanum á næstu sjö árum, þar á meðal ein með áður óútgefnum lögum og er hún væntanleg í nóvember. Einnig stendur til að gefa út DVD-mynddisk með öllum tónlistarmyndböndum popparans og endurútgefa Off The Wall, fimmtu hljóðversplötu hans sem kom út árið 1979. Áður en Jackson lést hafði hann einmitt lýst yfir áhuga á endurútgáfunni, þar sem nokkur óútgefin lög verður að finna.

Sala alls konar varnings tengdum Jackson hefur rokið upp úr öllu valdi síðan hann lést og á síðasta ári var hann einn tekjuhæsti tónlistarmaður heimsins. Sony hefur selt um 31 milljón eintaka af plötum hans síðan í fyrra, þar af fimm milljónir eintaka af hinni tvöföldu safnplötu Is This It.

„Á meðan Michael lifði setti hann ákveðin viðmið í tónlistarbransanum með samningum sínum,“ sagði John Branca, einn þeirra sem hefur umsjón með dánarbúinu. „Þessi tímamótasamningur við Sony Music sýnir hversu mikilvæg tónlist Michaels var.“

Rob Stringer hjá Sony var einnig ánægður með samninginn. „Við erum staðráðnir í að vernda arfleifð þessarar miklu goðsagnar og við erum ánægð með að geta haldið áfram að gefa heiminum tækifæri til að hlusta á tónlist hans í framtíðinni.“

Lát Jacksons hefur verið úrskurðað sem manndráp. Læknirinn Conrad Murray, sem meðhöndlaði hann með deyfilyfinu Propofol, hefur neitað ásökunum um að hann hafi valdið dauða hans.