Fjórar plötur á einu ári

„Þetta er örugglega alltof mikið til að gefa út en ég ætla samt að gera það," segir Dalvíkingurinn Daði Jónsson, eða Dathi, sem ætlar að gefa út fjórar plötur á þessu ári. Sú fyrsta, Self Portrait, er nýkomin út.

„Um áramótin fyrir ári síðan setti ég mér áramótaheit um að ég ætlaði að byrja að taka upp þrjá diska á síðasta ári," segir Daði. „Ég byrjaði á þeim fyrsta í febrúar og kláraði hann í október. Ég byrjaði á öðrum í september og á þriðja 30. desember þannig að áramótaheitið stóðst. Ég held að það sé það eina í lífi mínu sem hefur staðist."

Daði, sem er 36 ára, bjó í Englandi í tíu ár og safnaði þar bunka af lögum í sarpinn. Hann flutti heim til Dalvíkur fyrir þremur árum og var í nokkurn tíma að finna rétta mannskapinn til að taka upp með honum tónlist. Eftir að hann fékk að taka upp í nýju hljóðveri Gunnlaugs Helgasonar, bassaleikara í Pöpunum sem býr á Ólafsfirði, var ekki aftur snúið. Nýja platan og sú næsta eru samhangandi og fjalla þær um myrku hliðarnar á tilverunni. Þriðja platan verður samstarfsverkefni sem nefnist The Two Trees sem fjallar um umhverfismál en á þeirri fjórðu verður ástin í fyrirrúmi.

„Ég er alveg með tilbúnar átta plötur í viðbót. Ég verð bara að koma þessu frá mér svo ég geti farið að „funkera" almennilega," segir þessi afkastamikli tónlistarmaður. Hægt er að kaupa nýju plötuna í verslun 12 Tóna og á netsíðunni Gogoyoko.com. - fb