Jennifer hlustar á Lady Gaga þegar hún púlar

Bandaríska leikkonan Jennifer Aniston segir mikilvægt að hún hafi góða tónlist í eyrunum þegar hún skokkar eða tekur á því í ræktinni. Hún segir að þá sé best að hlusta á Lady Gaga, Jay-Z, Foo Fighters eða Radiohead. „Hún er tryllt góð,“ segir Jennifer um söngkonuna Lady Gaga.

Leikkonan sem er 41 árs er í mjög góðu formi. Hún segir mikilvægt að hún hreyfi sig reglulega og borði hollt „Lykillinn er hreyfing. Ef maður æfir reglulega getur maður allt,“ segir Jennifer sem þykir gott að skokka og fara í jóga.

Jennifer segir aftur á móti að allt sé gott í hófi og að hún sé ekki hrifin af öfgum þegar kemur að hreyfingu. Auk þess borði hún reglulega eitthvað óhollt eins og til dæmis hamborgara.