Tangómaraþon í tilefni af Mottu-mars

Tangófélagið efnir til veglegs tangómaraþons til styrktar átaki Krabbameinsfélags Íslands, Karlmenn og krabbamein: Mottu-mars. Þeir sem hafa ekki mikla reynslu af tangódansi, en hafa þeim mun meiri áhuga, geta mætt í kynningartíma í húsi Krabbameinsfélagsins í kvöld.

„Við munum kenna fólki fyrstu sporin svo að allir sem vilja geti komið og tekið þátt í þessum skemmtilega viðburði," segir Hany Hadaya sem mun leiðbeina fólkinu ásamt Bryndísi Halldórsdóttur og fleiri dönsurum frá Tangófélaginu. Aðgangseyrir er einungis 3.500 krónur en fyrir þann pening fæst kennsla og aðgangsmiði á maraþonið sem er sérhannaður bolur. „Við hvetjum alla til að koma en það er fátt ánægjulegra en að taka þátt í svona viðburðum og ekki verra ef við getum styrkt gott málefni í leiðinni!"

Kennslan í kvöld fer fram í húsi Krabbameinsfélags Íslands að Skógarhlíð 8 og hefst klukkan 18.

Nánar um málið á vefsíðu Krabbameinsfélagsins.