Corey Haim lagður til hinstu hvílu

Jarðarför leikarans Corey Haim fór fram í heimabæ hans í Toranto í Kanada í gær. Meira en 200 vinir og fjölskyldumeðlimir fylgdu Haim til grafar en fjölmargir aðdáendur hans komu saman fyrir utan.

„Það voru engar Hollywoodtýpur hérna. Bara vinir og fjölskylda," hefur People magazine eftir félaga leikarans.

Haim var ein skærasta unglingastjarnan í Hollywood á níunda áratug síðustu aldar. Hann lést fyrir viku 38 ára að aldri. Talið er að hann hafi óvart tekið of stóran skammt af lyfseðilsskyldum lyfjum. Fjögur lyfjaglös fundust hjá Haim þar sem hann fannst á baðherbergi í íbúð móður sinnar. Engin ólögleg fíkniefni fundust í líkama hans.

Corey Haim er þekktastur fyrir samstarf sitt við nafna sinn, Corey Feldman, en saman léku þeir í The Lost Boys, Licence to Drive og Dream a Little Dream. Feldman var ekki viðstaddur jarðarförina en birti þess í stað minningargrein um Haim á heimasíðu sinni.