Guðlaugur Þór: Hundrað milljón króna sparnaður í súginn

Dæmi eru um að læknar á St. Jósefsspítali fái tugi milljóna króna í árslaun fyrir hlutastörf. Læknir á spítalanum gagnrýnir Ögmund Jónasson heilbrigðisráðherra harðlega fyrir að loka spítalanum hægt og hljótt með því að skrúfa fyrir fé til læknisverka.

Guðlaugur Þór Þórðarson fyrrverandi heilbrigðisráðherra segir að hundruð milljóna króna sparnaður væri farinn í súginn því eftirmaður hans hafi ekki þorað að fylgja eftir hagræðingartillögum.

Sigurjón Vilbergsson sérfræðingur í lyflækningum og meltingarsjúkdómum skrifar grein í Morgunblaðið í dag þar sem hann fer yfir hvernig verið sé að skerða starfsemi spítalans. Hann segir fjármagn til læknisverka á spítalanum á þrotum og framtíð hans í algjörri upplausn.

Til stóð að gera spítalann að öldrunarstofnun í tíð fyrrverandi heilbrigðisráðherra, Guðlaugs Þórs Þórðarsonar, en það vakti mikla andstöðu meðal starfsfólks. Þeim áformum var slegið á frest þegar Ögmundur Jónasson tók við niðurskurðarhnífnum af Guðlaugi en Sigurjón segir Ögmund einfaldlega nota aðra leið til að hætta starfsemi spítalans, það er með því að loka á fjármögnun læknisverka.

Þannig hafi fjórtán skurðlæknum spítalans verið sagt upp rétt fyrir sumarfrí, starfsemi meltingarsjúkdómadeildar verði skert um tæp 35% á árinu sem þýði að tveir af fjórum meltingarlæknum gangi út í leit að nýrri vinnu á næstu dögum.

Það þýði jafnframt að um þriðjungur af 3000 árlegum speglunum séu í uppnámi. Þar með verði ónýtt fjárfesting í tækjum og mannafla. Sigurjón spyr hvað eigi þá að gera við þá þrjá einstaklinga sem greinast með ristilkrabbamein að meðaltali í viku hverri og dregur í efa að Landspítalinn hafi tök á að sinna þeim og þúsundum annarra sem koma í eftirlit á St. Jósefsspítala.

Nú þegar ráðningastopp sé á Landspítalanum og niðurskurðarhnífurinn eigi áreiðanlega eftir sverfa þar til stáls. Þá segir Sigurjón að síðast þegar leggja hafi átt niður starfsemi St. Jósefsspítala hafi ráðherra lofað óskertri þjónustu - nú virðist hins vegar ætlunin að leggja starfsemina niður hægt og hljótt.