Barinn þræll er mikill maður

Björn Þorláksson fréttamaður hélt ræðu á Ráðhústorgi á Akureyri í dag. Þar komu um hundrað manns saman í vikulegum mótmælum. Þetta var þrettándi fundurinn sem þar er haldinn en eftir ræðu Björns tókst fólk í hendur, myndaði hring og hugleiddi frið og samkennd í tíu mínútur.

„Feitur þjónn er ekki mikill maður. Barinn þræll er mikill maður, þvi í hans brjósti á frelsið heima," sagði Björn meðal annars í ræðu sinni og vitnaði þar í orð Halldórs Laxness úr Íslandsklukkunni. Hann sagði þessi orð nú rifjast upp þegar þjóðin stæði á krossgötum og yrði að finna sér nýjar lífsreglur að styðjast við.