Þjóðin er tortryggin gagnvart ESB

„Þessi skoðanakönnun staðfestir það sem við vissum áður; að það er mikill meirihluti þjóðarinnar sem er á móti aðild," segir formaður Heimssýnar, Ragnar Arnalds um nýja skoðanakönnun Gallups-Capacent sem var gerð fyrir Samtök iðnaðarins. Þar kemur fram að andstaða við aðild að ESB hafi aldrei verið meiri. Formaður Evrópusamtakanna, Andrés Pétursson, segir umræðuna um Icesave hafa mikil áhrif á niðurstöðuna og viðhorf Íslendinga til Evrópusambandsins.

Könnunin, sem Samtök Iðnaðarins létu gera fyrir sig, sýnir að um 50% svarenda segjast andvígir aðild en um 33% segjast hlynntir. Niðurstaðan gegn aðild hefur aldrei verið jafn afgerandi.

Andstaða í samræmi við fyrri skoðanakannanir

Ragnar, sem er andvígur aðild að ESB, segir niðurstöðuna vera í fullu samræmi við fyrri niðurstöður skoðanakannanna. Hann segir fylgið með og á móti þó sveiflukennt og bendir á að í miðju hruninu hafi almenningur verið jákvæður gagnvart inngöngu í Evrópusambandið. Það hafi hinsvegar breyst eftir áramót.

Spurður hvort umræðan um Icesave hafi haft mikil áhrif, segir Ragnar að það hafi hugsanlega spilað einhverja rullu, „það var náttúrulega Evrópusambandið sem vildi troða þessum samningum ofan í okkur," segir Ragnar sem kvíðir ekki hugsanlegri þjóðaratkvæðagreiðslu um ESB.

Icesave um að kenna

„Þessar niðurstöður koma ekkert á óvart miðað við þær umræður sem voru í gangi þegar könnunin var gerð," segir Andrés Pétursson, formaður Evrópusamtakanna, en könnunin var framkvæmd dagana 25. ágúst til 10. september 2009. Þá stóðu umræðurnar um Icesave hvað hæst.

Andrés segir að umræðan um Icesave hafi á stundum verið beintengd við ESB sem honum þykir ómaklegt.

Sjálfur stendur Andrés í þeirri von að þegar umræðan róist þá átti menn sig betur á því hvað aðild að ESB gengur út á. Hann telur að með upplýstari umræðu snúist dæmið við.

„Þá fara menn fyrst og fremst að hugsa út í það hvernig má hjálpa okkur út úr þessari lægð. ESB er ein leið samþætt af mörgum," segir Andrés en viðurkennir að almenningur er tortrygginn gagnvar ESB þessa daganna.

Þrjú ár í kosningar

Hann segir langt í kosningar um inngöngu í ESB. Sjálfur telur hann að þær verði ekki fyrr en í fyrsta lagi eftir þrjú ár.

„Þetta er langhlaup," segir Andrés vongóður um að þjóðin taki ESB opnari örmum í framtíðinni.