Hafnar fullyrðingum Óskars Bergssonar

Steingrímur J. Sigfússon, fjármálaráðherra, hafnar þeim fullyrðingum sem fram komu í máli Óskars Bergssonar, oddvita framsóknarmanna í Reykjavík, í fréttum í dag að samningur ríkisins við skilanefnd Glitnis opni fyrir erlent eignarhald á orkufyrirtækjum. Íslandsbanki sé aðeins að hluta tengdur HS orku og því ólíklegt að samningurinn við kröfuhafa verði til þess að fyrirtækið komist í eigu erlendra aðila.

Samningur ríkisins við kröfuhafa sem undirritaður var á sunnudag gerir kröfuhöfum kleift að eignast 95 prósent í bankanum.

Að mati Óskars opnar þetta á erlenda eignaraðild á orkufyrirtækjum þar sem Íslandsbanki einn af stærstu lánadrottnum Atorku, sem er í greiðslustöðvun, en félagið á hlut í HS orku í gegnum Geysir Green Energy.

Steingrímur bendir á að 56% hluta í HS Orku sé nú í eigu Geysis Green Energy sem sé sjálfstætt starfandi fyrirtæki. Viðræðuhópur á vegum ríkisins, lífeyrissjóða og Grindavíkurbæjar sé að hefja viðræður um kaup á þessum hlut í þeim tilgangi að tryggja opinbera og innlenda eigu á meirihlutanum í HS Orku.

Atorka á 41% hlut í Geysir Green Energy, en fyrirtækið er nú í greiðslustöðvun og því var það stærsti kröfuhafi þess, Nýji Landsbankinn, sem skipaði tvo fullrúa Atorku í stjórn Geysis Green á aðalfundi sem fram fór fyrir skömmu. Sjóður í eigu Íslandsbanka, þrotabús Stoða og lífeyrissjóðanna á síðan 40% hlut í Geysir Green. Íslandsbanki og lífeyrissjóðirnir skipuðu hvor sinn fulltrúa í stjórnina. Fimmta stjórnarmanninn á síða verkfræðisstofan Mannvit sem á 7% í fyrirtækinu. Nýji Landsbankinn mun verða að fullu í eigu ríkisins en kröfuhafar Glitnis eiga þess kost til mánaðarmóta að eignast 95% hluta í Íslandsbanka.