Persónuvernd veiti leyfi

Ríkisskattstjóri segir að mistök hafi valdið því að Jón Jósef Bjarnason tölvunarfræðingur fékk aðgang að fyrirtækjaskrá til þess að búa til gagnagrunn með myndrænum upplýsingum um tengsl manna í viðskiptalífinu. Persónuvernd hefur málið nú til meðferðar.

Skúli Eggert Þórðarson ríkisskattstjóri segir að vaninn sé að skoða mál af þessu tagi vandlega og bera þurfi þau undir Persónuvernd. Umsókn Jóns Jósefs, sem er fyrrverandi starfsmaður Ríkisskattstjóra, fór ekki í gegnum hefðbundið ferli hjá embættinu.

Jón Jósef Bjarnason sagði við Fréttablaðið að hann hefði gert samning við embætti Ríkisskattstjóra í byrjun september og greitt 180.000 króna leyfisgjald. „Þeir gáfu mér aðgang og ég taldi að við hefðum sama skilning á að það væri tilkynningarskylt til Persónuverndar en ekki leyfisskylt,“ sagði hann og sagði að sér þætti það dónaskapur að hann hefði ekki verið látinn vita áður en vefþjónustunni var lokað strax eftir að fréttir birtust í fjölmiðlum með upplýsingum úr gagnagrunninum um tengsl viðskiptajöfra. Hann bíður nú niðurstöðu frá Persónuvernd.

Sigrún Jóhannesdóttir, forstjóri Persónuverndar, sagði að umsókn vegna málsins hefði borist 3. september. Afstaða lægi ekki fyrir til þess hvort Jón Jósef þyrfti starfsleyfi. Lánstraust og fleiri aðilar sem miðla upplýsingum úr viðskiptalífinu hafa þurft starfsleyfi frá Persónuvernd. Gagnagrunnur Jóns Jósefs er nýkominn til sögunnar en Fjármálaeftirlitið hefur þó keypt aðgang að honum til afnota á innra neti sínu.