Heiðar aftur orðaður við Boro

Heiðar Helguson var í dag orðaður við Middlesbrough á ný en hann er á mála hjá Queen's Park Rangers.

Heiðar var einnig orðaður við Watford, sitt gamla félag, áður en félagaskiptaglugganum lokaði um síðustu mánaðamót. Hann sagðist hins vegar sjálfur í samtali við Vísi ekkert hafa heyrt af áhuga annarra liða. Hann vissi ekki betur en að hann yrði áfram í herbúðum QPR.

Samkvæmt enska dagblaðinu Daily Mirror í dag hefur Gareth Southgate, stjóri Boro, hug á að reyna að lokka Heiðar til félagsins eftir að honum tókst ekki að kaupa Rob Hulse frá Derby.

Boro bauð fjórar milljónir punda í Hulse í síðasta mánuði en hann hafnaði því. Í þetta sinn stóð honum til boða að fara til félagsins á láni til áramóta en hann hafnaði því einnig.