Íslenskur prófessor frelsar breskan fanga

Skýrsla sem íslenski rannsóknarprófessorinn Gísli H. Guðjónsson vann um breska fangann Ian Lawless átti stóran þátt í því að Lawless var látinn laus úr fangelsi eftir sjö ára afplánun. Lawless var gefið að sök að hafa orðið manni, sem ranglega var grunaður um barnagirnd, að bana í Grimsby.

Lawless, sem er 47 ára gamall, hefur ávallt haldið fram sakleysi sínu, en hann var handtekinn eftir að hafa stært sig af ódæðinu á krá. Sjálfur sagðist hann hafa skáldað söguna upp í ölæði.

Gísli er sérfræðingur í fölskum játningum. Hann komst að þeirri niðurstöðu að maðurinn væri veikur fyrir og haldinn sjúklegri þörf fyrir athygli. Hann hefði líklegast uppdiktað grobbið af morðinu.

Lawless var í síðustu viku sýknaður af morðinu og látinn laus, meðal annars á grundvelli skýrslu Gísla. Lawless er að vonum frelsinu feginn.

Þetta er ekki í fyrsta skipti sem rannsóknir Gísla verða til þess að veita saklausum föngum frelsi, en meðal mála sem hann hefur komið að eru til dæmis mál Birmingham-sexmenninganna og Barry George.

Gísli er rannsóknarprófessor við kennslufræði- og lýðheilsudeild Háskólans í Reykjavík, að því er kemur fram í frétt á vef háskólans.