Íbúar prjóna kærleikstrefil

„Okkur fannst það sniðug hugmynd að vera með fasta viðburði hér í miðrými Nýheima þar sem íbúar geta verið með athafnasemi,“ segir Björk Pálsdóttir, verkefnisstjóri Nýsköpunarmiðstöðvar Íslands á Höfn í Hornafirði.

Nýheimar er fræðslu- og þekkingarsetur á Höfn og verður það miðpunkturinn þar á Athafnavikunni sem hefst við hátíðlega athöfn í rúmlega hundrað löndum í dag.

Fjölmargt verður gert í vikunni á Höfn. Þar á meðal geta bæjarbúar komið með eigið afgangsgarn og prjónað saman kærleikstrefil, sem hengdur verður upp í bókasafninu á Höfn. Hugmyndin er að sem flestir geti tekið þátt í prjónaskapnum óháð getu og kunnáttu þátttakenda en Guðný Svavarsdóttir bókasafnsvörður mun verða fólki innanhandar við prjónaskapinn. „Þar fáum við tækifæri til að vinna að sameiginlegu verkefni sem minnir okkur á samstöðu og kærleik,“ segir Björk.

Auk kærleiksríks prjónaskapar geta bæjarbúar málað saman málverk í Nýheimum undir handleiðslu Guðrúnar Ingólfsdóttur listakonu, stigið upp á ræðukassa og tjáð sig með frjálsu sniði.

Björk segir þátttöku í Athafnavikunni á Höfn afar góða miðað við að undirbúningur hennar hafi byrjað af krafti fyrir hálfum mánuði. Björk segir hafa tekist að hvetja fólk til athafna og það hafi tekist vel enda Hornfirðingar mjög athafnasamir. Nú eru skráðir 33 viðburðir á Höfn.

Skráning viðburða á Athafnavikuna stóð nær sleitulaust yfir alla síðustu viku. Þegar skráningu lauk á föstudag voru viðburðir víða um land komnir yfir hundraðið. Þeir eru af öllum stærðum og gerðum.

Alþjóðlegu athafnavikunni verður formlega ýtt úr vör í Norræna húsinu í Reykjavík klukkan 17 í dag.

jonab@frettabladid.is