Vill bókina úr búðum

Helga Kress, fyrrverandi prófessor í bókmenntafræði, krefst þess að rithöfundurinn Böðvar Guðmundsson, og fyrrverandi eiginmaður hennar, láti innkalla upplag nýjustu skáldsögu sinnar, sem komin er í verslanir.

Böðvar Guðmundsson, sem sló í gegn með bókum um vesturferðir Íslendinga, fyrir röskum áratug, hefur sent frá sér skáldsöguna Enn er morgun. Í henni er fjallað um þýskan tónlistarmann sem flýr nasista til Íslands skömmu fyrir stríð. Undir lok síðustu viku, eftir viðtal við Böðvar í Kiljunni á RÚV sendi Helga Kress, tölvuskeyti til hans og afrit af því til útgefanda hans, Félags bókaútgefenda og Rithöfundasambandsins - þar sem hún biður hann:

„Að draga þessa bók til baka, þ.e. taka hana af markaði. Hún sé augljóslega að uppistöðu og miklu leyti um hana og foreldra hennar, m.a. um mjög svo viðkvæm einkamál sem hún hafi á sínum tíma trúað Böðvari fyrir." Þá segir hún jafnframt að bókin sé niðurlægjandi fyrir minningu foreldra hennar.

Helga hefur kennt bókmenntir við Háskóla Íslands í hartnær 30 ár en lét af störfum á þessu ári. Fréttastofa hafði samband við útgefanda bókarinnar - sem ætlar ekki að innkalla upplagið - og telur beiðni Helgu óskiljanlega. Böðvar Guðmundsson, sagði í samtali frá Danmörku að þetta væri misskilningur hjá Helgu og hann vonaði að málið myndi jafna sig. Helga sjálf vildi ekkert tjá sig þegar fréttastofa innti hana eftir því í dag hvort hún hygðist fara lengra með málið.

Fréttastofa leitaði til lögmanns í dag - sem sagði engan eiga slíkan einkarétt á lífi sínu að rithöfundur mætti ekki nota efni þess í bók. Böðvar hefur ekkert látið uppi um það hvort persónur hér eigi sér stoð úr lífi Helgu Kress, hvort heldur sem er verður bókin varla stöðvuð úr þessu - enda legið í hillum verslana í þrjár vikur.