Baldur: Gríðarlega sætt

Baldur Sigurðsson var hetja KR-inga í dag þegar hann skoraði sigurmark liðsins og var hann afar ánægður eftir leikinn.

"Þetta var gríðarlega sætt, gerist ekki betra en þegar þetta er svona. Ég heyrði líka einhversstaðar að þetta væri í fyrsta sinn í tólf ár sem KR vinnur á Hásteinsvelli sem gerir þetta enn betra."

KR-ingar komu afar vel stemmdir í fyrri hálfleikinn, var mikill hugur í leikmönnum? „Við bjuggumst við svipuðum leik og á móti Þrótti, þ.e. að Eyjamenn myndu liggja mikið til baka vegna stöðu þeirra. Þannig að við hugsuðum að eftir lélegan leik gegn Þrótt þar sem við duttum algerlega niður á þeirra tempó að við yrðum að gíra okkur upp og spila bolta með fáum snertingum og það gekk ágætlega í fyrri hálfleik. Í síðari hálfleik, hins vegar, vorum við bara slakir svo munurinn á liðinu var mikill á milli hálfleika. En þetta endaði með þremur stigum sem er gott."

Eyjamenn sýndu í dag að þeir eiga að vera teknir alvarlega því á köflum í leiknum voru þeir mun betri en KR. Það er því ljóst að Hásteinsvöllur verður erfiður heim að sækja í sumar. „Eyjamenn eru með fínt fótboltalið fullt af léttum strákum sem geta hlaupið og ég held að þetta verði gríðarlega erfiður völlur að koma á."

KR fær FH í heimsókn í næstu umferð, hvernig leggst leikurin í Baldur? „Mjög vel, það hefur þó sýnt sig á síðustu arum að KR hefur ekki gegnið alveg nógu vel gegn FH. Við unnum ÍBV á Hástein í dag svo við erum búnir að kveða niður eina grýlu og það er hugur í mannskapnum að kveða niður FH grýluna líka. Þetta verður klárlega leikur tímabilsins."