Umfjöllun: Baldur skaut KR á toppinn í Eyjum

Aðstæður til knattspyrnuiðkunar voru til fyrirmyndar í Vestmannaeyjum í dag þegar Bladur Sigurðsson tryggði KR-ingum stigin þrjú í 0-1 sigri KR.

Veður var mjög gott - sól og smá austan gola á annað markið. Hásteinsvöllur er yfirleitt flottasti völlur landsins og í ár verður engin breyting á, völlurinn er óaðfinnanlegur.

KR-ingar byrjuðu leikinn betur og það voru ekki liðnar nema 30 sekúndur þegar Björgólfur Takefusa, sem átt arfaslakan leik í dag, slap einn í gegn en Albert varði frá honum stórfenglega. Eyjamenn voru aðeins slegnir út af laginu í byrjun leiks en komust hægt og rólega aftur inn í leikinn.

Bæði lið fengu sóknir í fyrri hálfleik en engin aferandi færi, Óskar Örn Hauksson sýndi ef til vill bestu tilþrifin þegar hann negldi aukaspyrnu af 35 metra færi rétt yfir.

Eitthvað hefur Heimir Hallgrímsson messað yfir leikmönnum sínum í hálfleik en Eyjamenn mættu tvíefldir til leiks í seinni hálfleik og lokuðu á allar sóknir KR.

Besta færi Eyjamanna kom á 77. mínútu þegar Augustine Nsumba fékk boltann á kantinum vinstra megin og sendi hann fyrir. Ajay Smith sem átti flottan leik í dag fyrir Eyjamenn var þar einn og óvaldaður en skalli hans fór beint á Stefán Loga í markinu.

KR-ingar hirtu hins vegar öll stigin þegar þeir komust yfir á 87. mínútu gegn gangi leiksins. Eftir mikinn darraðadans í teignum rann boltinn á Guðmund Benediktsson sem plataði Andrew Mwesigwa upp úr skónum og skóflaði boltanum fyrir markið. Þar blakaði Albert Sævarsson boltanum út í teig, eftir klafs við Guðmund Pétursson, beint fyrir fæturnar á Baldur Sigurðsson sem þrumaði knettinum í þaknetið. Guðmundur Benediktsson var arkitektinn að þessu marki.

Eftir markið reyndu Eyjamenn hvað þeir gátu til að jafna en allt kom fyrir ekki. KR-sigur í Vestmannaeyjum en Eyjamenn sitja eftir sigurlausir og það sem verra er marklausir.

KR tyllti sér með sigrinum á topp Pepsi-deildarinnar með tíu stig eftir fjóra leiki en Fylkir getur jafnað þann árangur með sigri á Breiðabliki á morgun.

ÍBV-KR 0-1

0-1 Baldur Sigurðsson (87.)

Hásteinsvöllur. Áhorfendur: 618

Dómari: Eyjólfur M. Kristinsson (7)

Skot (á mark): 12-13 (6-7)

Varin skot: Albert 5 - Stefán 4

Horn: 6-4

Aukaspyrnur fengnar: 23-26

Rangstöður: 3-1

ÍBV (4-4-2):

Albert Sævarsson 6

Pétur Runólfsson 5

Eiður Aron Sigurbjörnsson 5

(23. Arnór Eyvar Ólafsson 6)

Andrew Mwesigwa 6

Matt Garner 6

Yngvi Magnús Borgþórsson 6

Andri Ólafsson 7

Tony Mawejje 4

(83. Ingi Rafn Ingibergsson)

Bjarni Rúnar Einarsson 4

Ajay Leicht Smith 7

Viðar Örn Kjartansson 4

(71. Augustine Nsumba)

KR (4-4-2):

Stefán Logi Magnússon 5

Skúli Jón Friðgeirsson 4

Bjarni Guðjónsson 6

Grétar Sigfinnur Sigurðsson 7 - maður leiksins

Jordao Diogo 4

Jónas Guðni Sævarsson 5

(32. Mark Rutgers 5)

Bladur Sigurðsson 5

Atli Jóhannsson 5

Óskar Örn Hauksson 7

Björgólfur Takefusa 4

(69. Guðmundur Benediktsson 5)

Prince Rajcomar 4

(75. Guðmundur Pétursson)