Rooney vill halda Tevez

Það er alveg ljóst hvað leikmenn Man. Utd vilja að forráðamenn félagsins geri í Tevez-málinu. Þeir vilja halda honum og nú síðast var Wayne Rooney að hvetja forráðamennina til þess ganga frá kaupum á Argentínumanninum.

Málið verður aftur á móti sífellt snúnara. Sir Alex Ferguson, stjóri Man. Utd, sagði eftir sigurinn á Wigan að viðræður hefðu farið fram en því hafnaði talsmaður eigenda Tevez. Það er því augljóslega nokkuð í land í málinu.

Sjálfur hefur Tevez sagt að hann vilji vera áfram en hefur þó viðurkennt að líklega verði hann að spila með öðru liði á næstu leiktíð.

„Carlos er heimsklassaleikmaður og maður vill hafa slíka leikmenn á Old Trafford. Hann hefur svo mikla orku og svo hefur hann skorað mikilvæg mörk. Hann leggur sig alltaf mikið fram og vonandi verður hann áfram með okkur," sagði Rooney.