Úrslitastundin er í dag

Forysta Sjálfstæðisflokksins vill að Samfylkingin samþykki tuga milljarða króna niðurskurð í ríkisútgjöldum til viðbótar við áður ákveðinn niðurskurð, eigi ríkisstjórnin að starfa áfram. Það er í samræmi við samkomulag við Alþjóðagjaldeyrissjóðinn.

Þingflokkar Sjálfstæðisflokks og Samfylkingarinnar munu funda hvor í sínu lagi klukkan 10 í dag. Á fundunum verður framtíð stjórnar­samstarfsins rædd. Heimildir Fréttablaðsins herma að í framhaldinu taki formenn flokkanna ákvörðun um það hvort stjórnarsamstarfinu verði haldið áfram.

Sjálfstæðismenn vilja að samkomulag verði gert um aukinn niður­skurð á ríkisútgjöldum, en í dag er gert ráð fyrir yfir 150 milljarða króna halla á yfirstandandi ári.

Samfylkingin hefur sett fram þrjú skilyrði fyrir áframhaldandi stjórnarsamstarfi, samkvæmt heimildum Fréttablaðsins. Fyrsta skilyrðið er að stjórn og stjórnendur Seðlabankans víki. Einnig er þess krafist að aðgerðaáætlun um efnahagslífið og peningastjórnun verði hrundið af stað.

Að lokum er sett það skilyrði að stjórnarskrá verði breytt fyrir kosningar í vor til að hægt verði að sækja um aðild að Evrópusambandinu í kjölfar kosninga.

Fréttablaðið hefur heimildir úr báðum stjórnarflokkum fyrir því að að sameining Fjármálaeftirlitsins (FME) og Seðlabanka Íslands hafi verið langt komin seint á síðasta ári. Hún hafi verið fyrirhuguð um áramót.

Þá hafi einnig verið fyrirhugað að samþykkja aukinn niðurskurð í ríkisfjármálum í takt við það sem Sjálfstæðismenn krefjist nú. Þá hafi uppstokkun í ríkisstjórn, og skipti á ráðuneytum milli stjórnarflokkanna átt að fara fram á sama tíma.

Heimildir úr Sjálfstæðisflokki herma að forysta Samfylkingarinnar hafi viljað fresta breytingunum vegna veikinda Ingi­bjargar Sólrúnar Gísladóttur, formanns Samfylkingarinnar. Heimildarmenn í Samfylkingunni segja að sjálfstæðismenn hafi ekki viljað fara í breytingarnar af jafn miklum krafti og Samfylkingin og áhuginn því koðnað niður.

Geir H. Haarde, formaður Sjálfstæðisflokksins, sagði í gær að ekki mætti rasa um ráð fram með mögulega sameiningu FME og Seðlabankans, og að engum útfærslum hafi verið hafnað.

Ingibjörg Sólrún segir að algjör forsenda fyrir sátt í samfélaginu sé að breytingar verði í Seðlabankanum. Björgvin G. Sigurðsson og Fjármálaeftirlitið hafi gengið á undan með góðu fordæmi og því hljóti sjónir manna að beinast að bankanum nú.

Ingibjörg segir þá hugmynd hafa komið upp að Samfylkingin leiddi ríkisstjórnina. „Það gæti alveg verið ástæða til þess að skoða breytingar á verkstjórnarvaldi."