Útfærsla á persónukjöri samþykkt í ríkisstjórn

Ríkisstjórn Íslands samþykkti á fundi sínum í dag frumvörp um persónukjör í bæði alþingis- og sveitarstjórnarkosningum. Er þetta í samræmi við 100 daga áætlun yfirvalda, en ekki hafði verið kveðið á um útfærslu persónukjörsins fyrr en nú. Frumvörpin verða næst lögð fyrir Alþingi.

Persónukjörskerfið sem lagt er til byggir á írskri fyrirmynd og felur í sér svipað kerfi og notað er við prófkjör.

Lagt er til að framboðslistinn verði tvískiptur. Á efstu sætum listans eru nöfn þeirra sem boðnir eru fram til persónukjörs og skal fjöldi þeirra vera jafn fjöldi þingsæta í kjördæminu, en sá hluti listans er óraðaður. Neðstu sæti listans skipa frambjóðendur sem boðnir eru fram með hefðbundnum röðuðum hætti.

Val kjósandans byggir síðan á sama fyrirkomulagi og tíðkast í prófkjörum, þar sem hann gefur hverjum frambjóðanda í hin óröðuðu sæti tölu eftir geðþótta.

Undirstrika ber að með þeim breytingum sem lagðar eru til, er hvorki hróflað við listakosningu né hlutfallskosningakerfinu hér á landi. Kjósendur munu eftir sem áður kjósa tiltekinn lista og hefur persónukjörið einungis áhrif á það hvaða frambjóðendur hreppa þau sæti sem listinn fær í viðkomandi kjördæmi eða sveitarstjórn samkvæmt niðurstöðu kosninganna.

Þorkell Helgason stærðfræðingur hefur haft umsjón með gerð frumvarpanna en jafnframt var settur á fót samráðshópur hagsmunaaðila.