Bjarni Guðjónsson: Svekkjandi að spila ekki sæmilegan leik

Bjarni Guðjónsson segir ekki gaman að taka þátt í keppnum nema til þess að sigra þær og er Evrópukeppnin engin undantekning þó sigurlíkur séu litlar.

"Það eru kaflar í þessum leik sem eru ekki eins við vildum en hinir tveir leikirnir gengu nánast fullkomlega upp hjá okkur, að liggja aftarlega og beita skyndisóknum. Við vorum með þá í fyrri hálfeik og þá gekk herbragðið fullkomlega upp en svo missum við einbeitinguna undir lokin á þessum leik. Þetta er mikið sterkara lið en Larissa og refsa okkur þegar við gerum mistök," sagði Bjarni eftir jafnteflið gegn Basel í kvöld.

"Við erum í því að elta því við erum eiginlega ekkert með boltann.Það er það sem er svo svekkjandi í þessu því við spilum ekki nálægt því okkar besta leik en gerum samt, 2-2, jafntefli við þá. Því hugsum við, hvað hefðum við geta gert hefðum við spilað sæmilegan leik, með því að halda hreinu og halda boltanum betur því það var það sem við ætluðum að gera hérna heima."

"Þeir ætla væntanlega ekki að taka jafntefli heima með væntanlega fullt hús hjá sér. Þeir ætla að taka litla liðið frá Íslandi og vinna það og ég held að styrkur okkar gæti falist í því að þeir ætla að vinna. Við ætlum ekki að pressa þá heldur liggja til baka en það er fullt af möguleikum. Við sjáum það í seinni hálfleik þegar við skjótum fyrir utan teig þegar við hefðum hugsanlega getað tekið eina sendingu í viðbót."

"Mér fannst vanta ákveðna trú í seinni hálfleik, að við gætum unnið þá. Það vantaði ekki sjálfstraust en það vantaði þá trú sem var gegn Larissa þegar við fundum að við vorum með þá í þeim leikjum. Við urðum betri er leið á leikina þar en það fór í öfuga átt í þessum leik. Við vitum það samt að við spiluðum ekki okkar besta leik en gerðum samt jafntefli þannig að það er allt hægt enn," sagði Bjarni að lokum.