Capello segir Aaron Lennon vera frábæran leikmann

Fabio Capello, þjálfari enska landsliðsins, var mjög ánægður með frammistöðu Aarons Lennon í 5-1 sigri Englendinga á Króötum á Wembley í undankeppni HM í gær. Englendingar tryggðu sig inn á HM með þessum sigri.

„Hann er búinn að vera frábær og við þurfum leikmann eins og hann. Það er ekki auðvelt að eiga við hann einn á einn," sagði Capello eftir leikinn í gær. Lennon fiskaði vítaspyrnuna sem gaf fyrsta markið í leiknum og hann lagði síðan upp annað markið sem var skallamark hjá Steven Gerrard.

Lennon hefur einnig verið einn af aðalmönnunum á bak við fullkomna byrjun Tottenham á ensku úrvalsdeildinni. „Lennon var alltaf í mínum huga í byrjunarliðinu á móti Króatíu. Ég horfði á hann á móti Birmingham og ég sá hann á æfingum í vikunni," sagði Capello.

Aaron Lennon var valinn í liðið frekar en menn eins og Theo Walcott, David Beckham og Shaun Wright-Phillips.