Umfjöllun: Meistarataktar hjá FH og Stjörnuvígið féll

Íslandsmeistarar FH sýndu styrk sinn með 1-4 sigri gegn Stjörnunni í Pepsi-deild karla á gervigrasinu í Garðabæ í kvöld.

FH-ingar eru með sigrinum komnir með þrettán stiga forskot á toppi deildarinnar en Stjörnumenn voru að tapa sínum fyrsta leik á heimavelli í Pepsi-deildinni í sumar.

Raunar hafði Stjörnuvígið staðið síðan 10. júlí í fyrra sumar þegar Haukar unnu þar 4-5 sigur í 1. deildinni.

Heimamenn í Stjörnunni litu þó út fyrir að mæta betur stemdari til leiks til að byrja með, án þess þó að skapa sér hættuleg marktækifæri, en þeir mættu FH framarlega á vellinum og það virkaði vel í fyrstu.

Gestirnir í FH voru þó ekki lengi að finna taktinn og sína styrk sinn og náðu að vinna sig vel inn í leikinn með léttleikandi sóknarleik.

Það dró til tíðinda á 18. mínútu þegar Hjörtur Logi Valgarðsson braust í gegnum vörn Stjörnunnar af vinstri kantinum og kláraði með góðu skoti sem markvörðurinn Bjarni Þórður Halldórsson hjá Stjörnunni réði ekki við.

FH-ingar efldust til muna við markið og héldu áfram að pressa stíft að marki Stjörnumanna sem virkuðu örlítið slegnir út af laginu.

Íslandsmeistararnir uppskáru annað mark eftir þunga sókn á 34. mínútu þegar boltinn barst í lappirnar á markahróknum Atla Viðari Björnssyni sem þakkaði pent fyrir sig og skoraði af öryggi af stuttu færi en stuttu áður hafði Matthías Vilhjálmsson átt skalla í slá.

Matthías átti þó heldur betur eftir að koma við sögu síðar í leiknum en staðan var 0-2 í hálfleik og forysta gestanna var verðskulduð.

Seinni hálfleikur fór vel af stað hjá FH þegar Matthías bætti við þriðja markinu með hnitmiðuðum skalla eftir aukaspyrnu Tryggva Guðmundssonar, sem bar fyrirliðaband FH í kvöld í fjarveru Davíðs Þórs Viðarssonar sem tók út leikbann.

Heimamenn náðu þó að klóra í bakkann þegar um stundarfjórðungur lifði leiks með marki Ellerts Hreinssonar eftir góða stungusendingu Björns Pálssonar en það reyndist skammgóður vermir.

Matthías var aftur á ferðinni tveimur mínútum síðar og bætti við sínu öðru marki og fjórða marki FH.

FH hafði annars góð tök á leiknum í síðari hálfleik og sigldi 1-4 sigrinum yfirvegað í höfn á lokakaflanum.

Stjörnumenn áttu hreinlega við ofurefli að etja gegn FH í leiknum í kvöld en Hafnfirðingar sýndu oft á tíðum frábæra takta og mikill meistarabragur var á leik liðsins.

Það verður spennandi að sjá hvað gerist þegar KR-ingar mæta í Krikann á sunnudag en með sigri þar gætu FH-ingar farið langt með að landa titlinum.

Tölfræðin:

Stjarnan - FH 1-4

0-1 Hjörtur Logi Valgarðsson (18.)

0-2 Atli Viðar Björnsson (34.)

0-3 Matthías Vilhjálmsson (52.)

1-3 Ellert Hreinsson (74.)

1-4 Matthías Vilhjálmsson (76.)

Stjörnuvöllur, áhorfendur óuppgefið

Dómari: Erlendur Eiríksson (6)

Skot (á mark): 11-12 (3-6)

Varin skot: Bjarni Þórður 2 - Daði 2

Horn: 6-6

Aukaspyrnur fengnar: 13-12

Rangstöður: 2-4

Stjarnan 4-5-1

Bjarni Þórður Halldórsson 5

Jóhann Laxdal 4

Guðni Rúnar Helgason 5

Tryggvi Bjarnason 5

Hafsteinn Rúnar Helgason 4

Ellert Hreinsson 6

Birgir Hrafn Birgisson 4

(78., Heiðar Atli Emilsson -)

Halldór Orri BJörnsson 6

Björn Pálsson 6

Arnar Már Björgvinsson 3

(81., Baldvin Sturluson -)

Alfreð Elías Jóhannsson 3

(88., Magnús Björgvinsson -)

FH 4-3-3

Daði Lárusson 7

Guðni Páll Kristjánsson 5

Tommy Nielsen 6

Sverrir Garðarsson 5

(29., Dennis Siim 7)

(83., Freyr Bjarnason -)

Hjörtur Logi Valgarðsson 7

Ólafur Páll Snorrason 6

(78., Brynjar Benediktsson -)

Björn Daníel Sverrisson 7

Tryggvi Guðmundsson 7

*Matthías Vilhjálmsson 8 - maður leiksins

Atli Viðar Björnsson 7

Atli Guðnason 6