Grannt fylgst með rússnesku olíuskipi

Landhelgisgæslan fylgist grannt með olíuskipinu Urals Star sem er á siglingu 12 mílur suður af Dyrhólaey með 106 þúsund tonn af hráolíu innanborðs. Fylgst er með skipinu eftirlitsbúnaði stjórnstöðvar Landhelgisgæslunnar enda afar viðkvæmur farmur um borð sem myndi valda miklum skaða ef eitthvað færi úrskeiðis, að fram kemur í tilkynningu frá Landhelgisgæslunni.

Skipið er á leið frá Murmansk í Rússlandi til austurstrandar Bandaríkjanna með olíu til hreinsunar. Skipið tilkynnti ekki siglingu sína innan hafsvæðisins eins og lög og reglur gera ráð fyrir og hafði því vaktstöð Landhelgisgæslunnar samband við skipið skömmu eftir þrjú í dag. Var skipstjóri upplýstur um óskir Íslands um að öll skip á leið um lögsöguna upplýsi um ferðir sýnar, ekki síst skip af þessari stærð og með slíkan farm. Fram kemur í tilkynningunni að skipstjórinn virðist ekki hafa verið kunnugt um þessar reglur.

„Breytt heimsmynd ásamt hlýnun loftslags á norðurslóðum hefur þau áhrif að Landhelgisgæslan hefur orðið vör við mikla aukningu flutninga- og farþegaskipa á Norður Atlantshafi. Stærð þessara skipa fer sífellt vaxandi og er því nauðsynlegt að vera viðbúin óhöppum sem geta orðið á íslenska hafsvæðinu," segir í tilkynningunni.