Látum ekki hræða okkur að einhverri niðurstöðu

Þorgerður Katrín Gunnarsdóttir segir boltann nú vera í höndunum Ríkisstjórnarinnar og vonar að hún klúðri Icesavemálinu ekki jafn hörmulega og hún gerði á sínum tíma. Þorgerður undrast vinnubrögð Ríkisstjórnarinnar í dag sem hún segir reyna að stýra umræðunni. Hún veltir fyrir sér hvaða hagsmuna Ríkisstjórnin er að gæta í málinu.

„Það er undarlegt að á sama tíma og við erum beðin um að fjalla um þessi mál í trúnaði, þá eru þessar upplýsingar komnar út um allt. Ráðherrar hafa jafnvel sagt að þetta sé jákvæð niðurstaða sem er bara alls ekki rétt. Þetta brýtur gegn allri þeirri hugsun sem kom skýrt fram í fyrirvörunum sem samþykktir voru á Alþingi," segir Þorgerður í samtali við Vísi að loknum þingflokksfundi.

„Lögin eru mjög skýr og þetta var það sem við sögðum alltaf. Það var sussað á okkar formann því ekki mátti tala um að um gagntilboð væri að ræða. En það er nákvæmlega þannig sem þeir horfa á þetta, og það er að okkar mati algjörlega óviðunandi. Það þýðir ekkert fyrir Ríkisstjórnina að skrifa undir neitt því að okkar mati stríðir það gegn lögum landsins."

Þorgerður segist hafa upplifað svipaða hluti í dag og þegar vinnan við fyrirvarana stóð sem hæst. „Maður kemur út af fundi í Stjórnarráðinu þar sem við vorum beðin um að hafa allt í trúnaði, þá er þetta bara komið út um allt. Ríkisstjórnin er bara við sama heygarðshornið og áður. Það er verið að reyna að stýra umræðunni og setja þetta í einhvern búning sem hentar þeim. Við tökum undir með að þetta er erfitt mál, en við látum ekki hræða okkur að einhverri niðurstöðu."

Þorgerður segir það ekki koma til grein af hálfu Sjálfstæðisflokksins að hverfa frá fyrirvörunum sem samþykktir voru á Alþingi. Þeir séu úthugsaðir af þinginu til þess að bjarga því sem bjargað var. „Þau voru með allt niður um sig í þessu máli og það hefur ekkert staðist af því sem Steingrímur eða Jóhanna sögðu, ekki neitt. Ég held að menn eigi að tala um málin eins og þau eru og læra af því að vera ekki að tippla á tánum í kringum málin og setja þau í annan búnin, ég héltt að menn væru búnir að læra þá lexíu."