Umfjöllun: Tryggvi stal senunni í áttunda sigri FH í röð

Íslandsmeistarar FH unnu 2-0 sigur á Fram á Laugardalsvelli í kvöld þar sem varamaðurinn Tryggvi Guðmundsson stal senunni og skoraði bæði mörk gestanna. Tryggvi kom inn á sem varamaður fyrir Alexander Söderlund á 9. mínútu og nýtti tækifærið vel.

FH-ingar eru nú búnir að vinna átta leiki í röð í Pepsi-deildinni síðan þeir töpuðu gegn Keflvíkingum í fyrstu umferð Íslandsmótsins.

Það var í raun ótrúlegt að staðan í leiknum hafi enn verið markalaus í hálflelik en Íslandsmeistararnir hreinlega óðu í færum, sérstaklega um miðbik hálfleiksins. Hannes Þór Halldórsson átti stórleik í marki Fram og varði oft á tíðum stórglæsilega.

Þar að auki átti Ásgeir Gunnar Ásgeirsson skot í slá og virtist lánleysi FH-inga algert.

En þeir gáfust ekki upp og hófu síðari hálfleikinn af miklum krafti. Það tók þá ekki nema rúmar tvær mínútur að brjóta ísinn og var Tryggvi þar að verki. Guðmundur Sævarsson átti sendingu fyrir markið og náði Tryggvi að hrista af sér Auðun Helgason og stýra boltanum í netið.

Seinna markið var keimlíkt því fyrra. Tryggvi vann sjálfur boltann á miðju vallarins og barst knötturinn á Matthías Vilhjálmsson sem átti fasta sendingu fyrir markið. Þar var Tryggvi aftur mættur á fjarstöng og aftur stýrði hann knettinum í autt markið.

Yfirburðir FH-inga voru algerir fyrstu 60 mínútur leiksins. Þá gerðu Framarar tvöfalda skiptingu og Ívar Björnsson kom inn á í sóknina. Hann átti langhættulegasta færi þeirra bláklæddu er hann lét Daða Lárusson verja frá sér úr góðu færi eftir laglegan undirbúning Hjálmars Þórarinssonar.

Nær komust þeir þó ekki og niðurstaðan 2-0 sigur FH sem hefur nú þar að auki haldið hreinu í fjórum leikjum í röð. Þeir virðast hreinlega óstöðvandi og sýndu enn og aftur hversu þrautsegir þeir eru. Þeir héldu ótrauðir áfram, sama hvað á gekk.

Framarar náðu ekki að fylgja eftir góðum 3-0 sigri á KR en liðið náði þó að köflum að setja saman ágætar sóknir þó svo að það vantaði mikið upp á að klára þær með þokkalegri marktilraun.

Fram – FH 0-2

0-1 Tryggvi Guðmundsson (48.)

0-2 Tryggvi Guðmundsson (51.)

Laugardalsvöllur. Áhorfendur: 903

Dómari: Einar Örn Daníelsson (6)

Skot (á mark): 8-22 (2-15)

Varin skot: Hannes 12 - Daði 2.

Horn: 3-7

Aukaspyrnur fengnar: 12-6

Rangstöður: 1-1

Fram (4-4-2):

Hannes Þór Halldórsson 8

Daði Guðmundsson 5

Auðun Helgason 7

Kristján Hauksson 7

Sam Tillen 5

Heiðar Geir Júlíusson 6

(76. Joseph Tillen -)

Halldór Hermann Jónsson 5

Ingvar Þór Ólason 5

(62. Jón Orri Ólafsson 5)

Paul McShane 4

Almarr Ormarsson 4

(62. Ívar Björnsson 6)

Hjálmar Þórarinsson 6

FH (4-3-3):

Daði Lárusson 7

Guðmundur Sævarsson 8

Pétur Viðarsson 7

Tommy Nielsen 8

Hjörtur Logi Valgarðsson 7

Davíð Þór Viðarsson 6

Matthías Vilhjálmsson 7

Ásgeir Gunnar Ásgeirsson 6

(90. Björn Daníel Sverrisson -)

Atli Guðnason 7

Alexander Söderlund –

(9. Tryggvi Guðmundsson 8) – maður leiksins

Atli Viðar Björnsson 5

(72. Matthías Guðmundsson -)