Michael Essien: Meiðslin gerðu mig að betri leikmanni

Chelsea maðurinn Michael Essien segir að hann sé miklu sterkari andlega og betri leikmaður eftir að hafa þurft að ganga í gegnum erfið meiðsli á síðasta tímabili. Essien sleit liðbönd í hné í landsleik í september en snéri til baka undir lok tímabilsins og hjálpaði Chelsea að vinna bikarinn.

„Meiðslin hjálpuðu mér í rauninni. Ég varð að harka af mér til þess að komast í gegnum endurhæfinguna og alla þá vinnu sem ég þurfti að leggja af hendi til þess að koma til baka. Ég kom því til baka betri en ég var," sagði hinn 26 ára gamli Essien.

„Ég varð að herða mig andlega til þess að komast í gegnum svona meiðsli. Ég hugsa ekki um meiðslin lengur enda er ég þannig leikmaður að ég gleymi öllu öðru en að spila fótboltaþegar ég er kominn inn á völlinn," sagði Essien.

„Það var mjög erfitt að horfa á leikina af pöllunum og sjá alla erfiðleikanna sem liðið mitt þurfti að ganga í gegnum á síðasta tímabili. Ég vil vera með mínum liðsfélgöum inn á vellinum þar sem við vinnum eða töpum saman sem lið," sagði Essien.