Tevez vill gera allt til þess að ná United-leiknum

Hnémeiðsli Carlos Tevez eru það slæm að hann gæti verið frá í tvær til þrjár vikur. Tevez meiddist í tapleik argentínska landsliðsins á móti Brasilíu um síðustu helgi.

Tevez vill gera allt til þess að ná leiknum á móti sínum gömlu félögum í Manchester United en það er ekki líklegt að hann verði orðinn góður af meiðslunum fyrir þann leik sem fer fram 20. september.

„Læknar argentínska landsliðsins segja að hann verði frá í tvær til þrjár vikur. Við teljum að sá tími gæti styst eitthvað en það er óvíst hvort hann nái sér góðum fyrir derby-slaginn," sagði Mark Hughes, stjóri Manchester City.

„Við gerum allt til þess að hann verði orðinn góður því það af augljósum ástæðum dauðlangar honum að spila þennan leik," sagði Hughes.