Keppir á HM þrátt fyrir ævilangt bann

„Ég hef átt flekklausan feril og vil ekki tengja mitt nafn við slíkan mann,“ segir Magnús Ver Magnússon, sem kveðst munu sniðganga fyrirhugað heimsmeistaramót í kraftlyftingum vegna þátttöku aflraunamannsins Jóns Gunnarssonar.

Magnús segir að Jón hafi tvisvar verið staðinn að neyslu ólöglegra lyfja og hafi verið dæmdur í ævilangt keppnisbann hjá heimssambandinu IPF, International Power­lifting Federation. Þess utan minnir hann á að lögreglan hafi fundið gríðar­legt magn steralyfja á heimili Jóns í húsleitum á árinu 2007.

Jón er meðal tólf Íslendinga sem nú eru sagðir öruggir með þátttöku á heimsmeistaramóti sem hefst í Las Vegas 10. nóvember næstkomandi. Mótið er haldið af öðru heimssambandi en IPF, eða World Powerlifting Federation, sem skammstafað er WPF.

Hér heima eru mismunandi félög kraftlyftingamanna sem eiga aðild að mismunandi heimssamböndum. Það er kraftlyftingafélagið Metall sem á aðild að WPF og sendir þangað áðurnefnda tólf keppendur og hugsanlega fleiri. Jón Gunnarsson, sem stendur á fimmtugu, ætlar að taka þátt í flokki 50 til 59 ára.

„Ég er búinn að ræða við formann Metals og benda á að það sé ekki gott afspurnar að senda mann með slíka fortíð til keppni. Sjálfur hef ég ekki áhuga á því að vera með ef þetta á að vera svona og mun ganga úr þessu félagi ef af verður,“ segir Magnús.

Um síðustu helgi sigraði Magnús á móti hér heima og kveðst vera að ná sér á strik eftir á þrálát meiðsli. Eins og kunnugt er sigraði Magnús fjórum sinnum í keppninni um titilinn sterkasti maður heims, síðast fyrir þrettán árum. Hann er nú 46 ára gamall.

Jón Gunnarsson segir málflutning Magnúsar byggðan á misskilningi. Hann heyri ekki lengur undir heimssambandið IPF heldur undir WPF, sem stendur fyrir mótinu í Las Vegas. „Það er fullt af mönnum sem eru í sams konar ástandi sem eru að keppa þar. Það eru engin boð og bönn í því,“ segir Jón.

Þá kveðst Jón enga trú hafa á því að Magnús geti keppt á heimsmeistaramótinu. „Hann er ekki í neinu formi þótt hann hafi verið að keppa um daginn,“ segir hann.

Ekki náðist í Hermann Haraldsson, formann Metals.