Bentley kærður fyrir ölvunarakstur

Breskir fjölmiðlar greindu frá því í dag að miðjumaðurinn David Bentley hjá Tottenham hafi verið handtekinn fyrir ölvunarakstur eftir að hafa klessukeyrt Porsche 911 bifreið sína í fyrrinótt.

„Hann hefur verið kærður fyrir ölvunarakstur og mun koma fyrir dómsstóla þann 28. ágúst næstkomandi," segir talsmaður lögreglunnar í Hatfield á Englandi.

Fyrrum enski landsliðsmaðurinn Bentley hefur ekki fundið sig sérstaklega vel eftir félagsskipti sín til Tottenham frá Blackburn en hann hefur sjálfur gefið út yfirlýsingu varðandi málið þar sem hann biðst afsökunar á athæfi sínu.

„Ég vill biðja Tottenham og aðdáendur félagsins afsökunar. Ég er að sama skapi þakklátur fyrir að enginn meiddist af völdum árekstursins. Að lenda í þessu atviki er uppvakning fyrir mig sem persónu og sem atvinnumaður í fótbolta og ég mun taka á þessu og bæta ráð mitt," segir í yfirlýsingu leikmannsins.