Logos vann lögfræðiálit fyrir Baug

Faglegur framkvæmdarstjóri lögfræðistofunnar Logos, Gunnar Sturluson, stendur við það að lögmenn stofunnar hafi aldrei unnið fyrir Baug í yfirlýsingu sem hann sendi frá sér rétt fyrir hádegi. Í frétt sem birtist frá Vísi fyrr í morgun kom fram að hæstaréttarlögmaðurinn Hákon Árnason hafi verið falið að sjá um undirbúning fyrir málshöfðun Baugs gegn ríkinu árið 2005.

Í yfirlýsingu Gunnars segir: „Að gefnu tilefni skal einnig tekið fram að stofan var með til skoðunar eitt afmarkað skaðabótamál fyrir Baug á árinu 2005 og var Héraðsdómi Reykjavíkur að sjálfsögðu gerð grein fyrir því. Önnur verkefni sem stofan hefur unnið að og Baugur tengist með óbeinum hætti voru fá og er öllum lokið."

Þegar haft var samaband við Gunnar sagði hann að Hákon hafi unnið lögfræðiálit fyrir Baug um grundvöll þess að Baugur færi í skaðabótamál gegn ríkinu. Hákon hafi skilað lögfræðiáliti á fundi og þar með hafi afskiptum lögmannsins lokið í málinu. Skaðabótakrafan rataði aldrei fyrir héraðsdóm. Að auki hefur Hákon látið af störfum fyrir Logos.

„Okkar trúnaður liggur hjá kröfuhöfum í þrotabú Baugs og hlutverk skiptastjóra er að gæta jafnræðis kröfuhafa og ítrustu hagsmuni. Það munum við að sjálfsögðu gera," sagði Gunnar þegar haft var samband við hann vegna málsins.

Í yfirlýsingu Gunnars segir ennfremur: „Rangt er að Gunnar Sturluson faglegur framkvæmdastjóri LOGOS hafi sagt að lögmannsstofan hafi aldrei unnið fyrir Baug. Hið rétta er að Gunnar sagði við visir.is að stofan hefði „ekki starfað sem lögmenn fyrir Baug" og við þá yfirlýsingu er staðið að fullu."

Vísir áréttar að tilvitnun Morgunblaðsins í frétt Vísis sem birtist í morgun var ónákvæm, ummæli Gunnars birtust orðrétt, eins og hann setur þau fram í yfirlýsingunni, í viðtali við Vísi á föstudaginn.