Reisa NATO og öðrum heimsvaldasinnum níðstöng

Samtök hernaðarandstæðinga á Norðurlandi hafa ákveðið að reisa Atlantshafsbandalaginu (NATO) níðstöng til að fyrirbyggja komu heimsvaldasinna til landsins vegna ásælni þeirra í olíulindir í Norðurhöfum.

Bandaríski flugherinn framkvæmdi í gær aðflugsæfingar að Akureyrarflugvelli í tengslum við loftrýmiseftirlit NATO hér á landi. Samtökin mótmæla loftrýmiseftirlitinu.

„Samtök hernaðarandstæðinga á Norðurlandi óska þess að hernaðarbandalagið Nató muni ekki venja komur sínar til Akureyrar í framtíðinni. Við óttumst þó að herveldin muni ekki verða við ósk okkar, en það er ljóst að heimsvaldasinnar renna hýru auga til olíulinda og samgönguleiða í Norðurhöfum," segir í tilkynningu frá samtökunum.

Samtök hernaðarandstæðinga á Norðurlandi hafa því ákveðið að grípa til fyrirbyggjandi aðgerða og reisa NATO níðstöng „til að fyrirbyggja að heimsvaldasinnum verði ágengt í ásælni sinni."

Athöfnin fer fram á morgun á suðurbílastæði Akureyrarflugvallar klukkan 14:30.