Didier Drogba: Ég fórna mér oft fyrir liðið

Didier Drogba vill fá meira hrós fyrir hversu óeigingjarn hann er inn á fótboltavellinum. Drogba er einn öflugasti framherji heims bæði með Chelsea og landsliði Fílabeinsstrandarinnar en hann segir að fáir taki eftir því hversu duglegur hann er án boltans.

„Ég fórna mér oft fyrir liðið. Ég er ekki að skoða tölfræðina yfir mörk en hefur þú einhvern tímann séð svona frábæran framherja hamast eins mikið í vörninni eins og ég geri?" spyr Drogba. Hann hefur skorað 3 mörk og átt 3 stoðsendingar í fyrstu fjórum leikjum Chelsea en liðið hefur unnið þá alla með markatölunni 10-2.

„Við höfum mikið sjálfstraust en erum um leið afslappaðir. Liðið okkar er öflugt og sterkt andlega. Það bera allir mikla virðingu fyrir Carlo Ancelotti og hann er eins og einn af okkur. Það gerir liðandann frábæran," segir Drogba.