Sóley staðin að ólöglegum veiðum

Eftirlitsflugvél Landhelgisgæslunnar, TF-Sif stóð í gær togbátinn Sóleyju SH-124 að meintum ólöglegum togveiðum undan Barða milli Önundar- og Dýrafjarðar.

Í tilkynningu frá Landhelgisgæslunni segir að vélin hafi verið á eftirlitsflugi úti fyrir Vestfjörðum, þegar eftirlitsbúnaður vélarinnar sýndi skip sem virtist vera nærri 12 mílna togveiðimörkunum þar sem veiðar eru bannaðar samkvæmt lögum um veiðar í fiskveiðilandhelgi Íslands.

„Flogið var yfir skipið sem reyndist vera SÓLEY SH-124," segir einnig. „Haft var samband við skipstjóra og honum tilkynnt að hann hafi verið mældur innan við leyfileg togveiðimörk. Var honum gert að hífa inn veiðarfæri og halda til hafnar þar sem mál hans yrði tekið til frekari rannsóknar."

Að sögn Gæslunnar kom skipið til Grundarfjarðar síðastliðna. nótt þar sem málið er nú í höndum Lögreglustjórans á Snæfellsnesi sem annast skýrslutöku og rannsakar málið frekar.