Segir svínarí með milligjafir á undanhaldi

Síðastliðið haust fór að bera á auglýsingum þar sem bílar voru boðnir til sölu gegn yfirtöku á láni og peningum í kaupbæti. Upp frá því spruttu upp sögur af fólki sem vissi að það væri hvort eð var á leið í þrot og nýtti sér því slík kjör. Hirti peninginn og lét sig hverfa.

„Þetta var stundað svolítið síðastliðið haust," segir Guðfinnur Halldórsson, betur þekktur sem Guffi bílasali. Hann segir hinsvegar erfitt fyrir menn að svína með þessum hætti í dag þar sem kaupleigufyrirtækin eru ekki reiðubúin að flytja lán sem eru hátt yfir virði bílsins yfir á annað nafn án þess að fá nokkurt veð í staðinn.

Guffi segir hinsvegar algengt að menn borgi niður lánin sjálfir svo hægt sé að selja bílana á gangvirði. „Ég seldi bíl í gær á um 900 þúsund en seljandinn hafði sjálfur borgað niður rúmar 300 þúsund krónur til að lækka lánið á bílnum svo hægt væri að selja hann. Sá peningur fór beint til kaupleigufyrirtækisins."

Hann segir þetta þó vissulega hafa gerst. „Jú jú, þetta skeði hérna. Menn sem vissu að þeir voru að fara í gjaldþrot. Svo keyptu þeir bíla sem borgað var með, og skildu bíllyklana bara eftir á borðinu og gengu út með peninginn."

Guffi segir að margir hafi farið fram úr sér í bílakaupum í góðærinu. „Hvaða heilvita maður sem er með milljón á mánuði fer og kaupir sér bíl á átta milljón króna láni? Svo er þetta fólk hissa að það lendi upp við vegg. Það hefði hvort sem er lent upp við vegg."

Hann segir marga hreinlega hafa hagað sér „eins og fífl" í góðærinu. „Er einhver glóra að maður aki um á átta cylindra pikköpp trukk, með hjólhýsi í eftirdragi og fjórhjól á pallinum? Helgarferðin kostar ekki undir 80 þúsund kalli. Svo er fólk hissa á þessu."

Guffi segist ekki hafa farið varhluta af vitleysunni sjálfur. „Ég keypti mér nýjan Merzedes Benz. Tók fjögurra milljón króna lán en hann er auðvitað kominn í átta milljónir. Ég ætla bara að láta kistuleggja mig í honum," segir Guffi. „Ég gerði mér auðvitað alltaf grein fyrir því að þetta væri síðasti bensinn sem ég myndi kaupa í lífinu."

Hann segir umhverfi bílasala hafa gjörbreyst. „Það er allt búið að bakka um fjörutíu ár."