Haukur Páll: Sýndum að við erum úrvalsdeildarlið

Miðjumaðurinn Haukur Páll Sigurðsson átti stóran þátt í 1-3 sigri Þróttar gegn Fjölni í botnbaráttuleik Pepsi-deildarinnar á Fjölnisvellinum í kvöld en hann skoraði eitt mark Þróttar og lagði annað upp.

Haukur Páll hrósaði liðsfélögum sínum í leikslok í kvöld fyrir að gefast ekki upp þó svo að liðið hefði lent 1-0 undir.

„Við héldum bara skipulaginu þrátt fyrir að lenda undir og það var það sem skóp sigurinn á endanum. Við vorum búnir að fara vel í það í vikunni hvernig við ætluðum að leggja leikinn upp og mér fannst okkur takast nokkuð vel til í kvöld, sérstaklega í seinni hálfleik," segir Haukur Páll.

Spurður út í þjálfaraskiptin kvaðst Haukur Páll ánægður með að Þorsteinn Halldórsson hafi tekið við úr því sem komið var að Gunnar Oddsson væri hættur en Þorsteinn var áður aðstoðarþjálfari hjá Þrótti.

„Ég er ekkert á því að það sé alltaf rétt að reka þjálfarann en eitthvað varð að gera. Fyrst að Gunni hætti þá er ég alla vega ánægður með að fá toppmann eins og Þorstein í staðinn.

Það býr mikið í þessu liði og við sýndum í kvöld að við erum úrvalsdeildarlið. Þetta var gríðarlega mikilvægur sigurleikur hjá okkur og nú hlökkum við bara til næsta leikjar," segir Haukur Páll.